نهاية عالم

نظر زوربا الى الهارمونيكا اللتي صنعها بايده من ورقة سرخس, استغرقته العملية شهر كامل. شهر مدة طويلة في حياة حلزون مع ذلك شعر زوربا بالفخر "كثير اشياء ممكن تنجزها لما تقضي ثلث حياتك تحت شجرة قبصف" زوربا ما كان يعرف انه اسمها ليمون بس كلمة قبصف عجبته وشاف انها ملائمة.

وزوربا بفكر كيف انه رح يقضي الثلثين اللي ضايلين من حياته وهو بحاول يتعلم يعزف على الهارمونيكا وكيف رح يمنع نفسه من انه ياكلها زي المرة الماضية. شاف اشي جاي من بعيد, او بالاحرى جسم جاي من بعيد, جسم نملة بالتحديد.

الحلزون عرف انه هاي النملة بعيدة كل البعد عن مملكتها من قذارتها ومن مستشعراتها المعوجة. عرف انه رح يحتاج كثير من شاي القبصف عشان يهديها.

لحسن الحظ كان بعرف لغة النمل لأنها اللغة الوحيدة المستعملة بحديقة "الشجرات العشرة".

"مرحبا جارتي النملة, انا زوربا. شو اسمك ؟" حاول زوربا يكون مبتسم قدر المستطاع.

"رهيب !! اللي صار فظيع, مرعب ومثلث !"

زوربا ما كان يفهم لغة النمل كليا, فتوقع انه كلمة مثلث فهمت خطأ او انه النمل عندهم اسلوب غريب في وصف الاشياء.

"هدي اعصابك, اشربي قبصف واحكيلي شو هو المثلث اللي صار"

"العالم تدمر, ما ضل ولا نملة, انا والنملة رقم3254 الوحيدين اللي ضلينا على قيد الحياة"

"طيب وين النملة3254؟"

"اكلتها بعد ما ماتت من التعب"

زوربا ما كان بعرف انه النمل ممكن يوكل نمل, الموضوع ما ازعجه كثير بالنهاية النمل بستغلوا كل الموارد المتاحة.

"طيب, هدي اعصابك واشربي قبصف, الموضوع بسيط ورح نلاقي حل"

"شكرا بس خلص انا لقيت الحل وانا بتغذى على جثة زميلتي."

"ممتاز وشو هو الحل؟"

"بما انه العالم تدمر وما في اي مكان اخزن فيه اكل للشتاء وما في ملكة نعبدها الحل الوحيد هو اني اضل امشي الى ان اموت من التعب مثل زميلتي, هذا هو الحل الوحيد"

"حل مبتكر صراحة, ممكن اقترح عليكي حل ثاني؟"

"ما في داعي, هذا هو الحل المثالي لمصيبة مثلثية زي هاي"

"شو رأيك تقضي بقية حياتك هون عندي تساعديني اتعلم هارمونيكا وتمنعيني اكلها ؟"

"وين بدي اخزن الاكل؟ اللي بتحكي فيه غير منطقي, ما في اي نمل امشي معه بخط مستقيم"

زوربا ما عرف يرد , بالنهاية هو ما كان يفهم "المنطق والنظام" اللي النمل بحكوا فيه طول الوقت.

"شو رأيك تنامي هون الليلة والصبح تقرري لأنه شكلك مرهقة"

"معك حق, حاسسة اني رح اموت من التعب"

مشى زوربا للشجرة لكي يحضر ورقة قبصف للنملة لتاكلها قبل ما تنام, استغرقه المشي نصف النهار وعندما رجع لم يجد النملة بل وجد رسالة منها, للاسف زوربا كان يفهم كلام النمل لكنه لم يفهم الرسائل

احس زوربا بالحزن الشديد بعد ان لاحظ انه كان ياكل الهارمونيكا مرة ثانية.