خمس ايدي مسكت خمس مسدسات على الطاولة, وجهت الايدي المسدسات الى نفس رؤوس اصحابها
لحظة صمت طويلة وهم بنظروا الى بعض, ما عدا بني, بني كان بتطلع على بقعة دائرية صنعها فنجان كان هناك بدون صحنه.
احمر:يلا ؟
بنفسجي: يلا ! بس كيف بدنا نسويها؟
اسود:الموضوع بسيط, بتضغط الزناد, بوم, مخك على الحيط وبتموت!
بني(بعد ما استيقظ من سرحانه بالبقعة): لا! ما بدي المخ على الحيط. امي رح تقتلني.
اسود: بني اهدى, امك ما رح تقتلك. اولا انت رح تكون ميت اصلا وثانيا امك ماتت من سنة
بني: اه صح امي ماتت, بس مين رح ينظف الحيط؟ ممم,, ما بقدر انتحر واتركها زي هيك ! ما بقدر!"
احمر(بصرخ): شو قصدك ؟ بدك تبطل؟! بعد كل اللي اتفقنا عليه ! احكيلك كلمة يا اخضر
اخضر: قفتا ,,شتقفا ,, تيقف
اسود: شيل المسدس من ثمك قبل ما تحكي يا اخضر
اخضر: انا بحكي حرام بني يموت مش مرتاح, مش عدل بالنسبة اله
بنفسجي:المفروض الحكي هذا عملت حسابه من لما حكينا الفكرة يا بني.
بني: طيب خلينا نرجع لفكرة السم, كثير انظف وما في طرطشة على الحيط.
احمر: مش تناقشنا بالموضوع ؟ بنفسجي صاحبنا هون ما بحب يبلع حبوب وما لقينا سم بنشرب.
بنفسجي: شو اعملك؟! حلقي ضيق وما بقدر ابلع حبوب, بعدين انت اللي ضيعت علينا فكرة اننا نط من سطح, فاسكت!
اسود: الموضوع مش مستاهل يا جماعة, هدوا بالكم. لو فردنا مشمع بلاستيك على الحيط وتركنا ملاحظة للمسعفين انهم يشيلوه بنفع معك يا بني ؟
بني: اه ممكن ...
احمر: مش اتفقنا ولا واحد يترك رسالة انتحار ؟!
بنفسجي: بس هاي مش رسالة انتحار, هاي طلب من للنظافة من العالم الاخر
اخضر: انا الفكرة عاجبتني صراحة
بني: مشكلة واحدة, ما ضل عندي شراشف بلاستيك.
اخضر: طيب يلا نروح نجيب, بالمرة بنمر بنجيب اكل لأني جعان, حدا بده اشي يا جماعة؟
بنفسجي: شو بدك تجيب؟
اخضر: مش عارف, غالبا بيتزا
اسود: جيبلي علبة بطاطا مقلية من اي مكان
بنفسجي: جيبلي اي اشي انت بتجيبه لحالك, بدك اشي احمر؟
احمر: كنت بدي سم الهاري بس الاخ هون مش ملاقيه
اسود: روق يا زلمة, ما في ورانا اشي, خذلك سيجارة وخلينا نحضر فلم بكونوا خلصوا تعليق الشراشف
*بعد مرور ساعتين*
بنفسجي: حكتلك جيبلي اي اشي بس مش بيتزا بفطر, بتعرف اني ما بحب الفطر !
اخضر: مين ما بحب الفطر
اسود: انا ما بحب الفطر, عشان هيك طلبت بطاطا, لأنه دايما بتعملها وبتجيب كل اشي بفطر
احمر: اه, ما في غيرك بحب الفطر هون . بتتذكروا لما جاب كيكة الفطر ؟
بني: هاهاها اه بتذكر, من وين لقيت كيكة بالفطر؟
اخضر: ما كانت بالفطر يا غبي, قصده كانت على شكل فطر زي اللي بلعبة ماريو
اسود: المهم نرجع لموضوعنا, يلا كلكم ارجعوا على الطاولة والكل يوخذ مسدسه
بنفسجي: متأكد يا اخضر هذا مسدسك؟ ما بدي لعابك يكون على وجهي !
اخضر: اه متأكد, مبلول المسدس
احمر: ليش حاطه في تمك اصلا؟ مش المفروض كلنا نعمل نفس الحركة ؟
اسود: احمر معه حق, كلنا لازم نفس الحركة.
بني (بعد ما ازاح المسدس من نص جبينه): اه انا مع هاي الفكرة, ما بحب مكان مسدسي, انحولت وانا بتطلع على المسدس
بنفسجي: انا بحكي تعملوا مثلي انا واسود وتحطوه على راسكم من اليمين
احمر: بس انا عاجبني مكانه على ذقني !
اسود: مش انت بدك نفس الحركة, خلينا على حركة الاغلبية, المسدس على يمين راسك.
اخضر: بس انا بستخدم ايدي الشمال, رح يكون الموضوع صعي بالنسبة الي
اسود: مش مشكلة, استخدم ايدك الشمال
احمر: طيب ماشي زي ما بدكم, بس يلا خلصوني
بنفسجي: شو رايكم اعد تنازلي ؟
بني: اه انا مع الفكرة, خليني اعد تنازلي
بنفسجي: لا انا بدي اعد تنازلي, انت كثير بطيء بالعد وبتنسى
بني: انتوا ما بتخلوني اعمل اشي
احمر: خليناك تعلق الشراشف
اسود: خلص خلي بنفسجي يعد, يلا بلش بنفسجي واحد اثنين ثلا...
اخضر: فكرت بنفسجي اللي بده يعد, ليش انت بتعد ؟
اسود: انا بعد للثلاثة عشان يبلش بنفسجي يعد
بني: طيب خلوني اعد لبنفسجي عشان يبدا عد
احمر: لا, انت ممنوع تعد!
بنفسجي: طيب كلكم عدوا عشان ابلش عد
احمر: انا ما بدي, ما بحب اعد, عدوله بدوني
كلهم الا احمر: واحد اثنين ثلاثة!!
بنفسجي: عشرة,,, تسعة,,, ثمانية,,, سبعة,,,
اخضر: استنى شوي !!
احمر: شو في هسا؟ ايدي تعبت من هاي المسكة, كان لازم ضلينا على الذقن
اسود: موضوع المسكة اتفقنا عليه, شو بدك يا اخضر؟
اخضر: شو رايكم اشغل موسيقى تتماشى مع الموقف ؟
بني: اه فكرة حلوة !
بنفسجي: شو بدك تشغل؟
اخضر: ملحم بركات
احمر: مش رح اودع الحياة وانا بسمع ملحم بركات !!
اسود: شغل جاز, في عندي كم اغنية جاز كويسة على الموبايل
اخضر: بس تلفونك ما بشتغل على السماعات اللي عندي
بنفسجي: شغل ميتال, الميتال دموي وبتماشى مع الوضع
بني: لا ما بحب الميتال
احمر: طيب خلينا نشغل اي قناة اغاني ونشوف شو في عليها ونخلص.
اسود: لا لا فكرة سيئة, كل اللي عليها اغاني مجوز ورقص.
اخضر: طيب خليني امشي الاغاني اللي عندي ونشوف اشي يعجبنا كلنا
احمر: اي اشي الا ملحم بركات تبعك !
اخضر: بس صوته حلو, اعطيه فرصة ثانية
احمر: بحياة ثانية ان شاء الله
اسود: شغل نشوف شو في عندك؟
*بعد مرور ساعة الا ربع*
اخضر: هي كل اشي عندي
بني: رجع اغنية الدبكة, عجبتني كثير
بنفسجي: لا كله إلا الدبكة
اسود: انا زهقت, خلص نخليها لبكرة؟
اخضر: لا بكرة مش فاضي, طالع تخييم مع صاحبتي
بنفسجي: اه وانا عندي مناقشة مشروع تخرج
احمر: انتوا كيف بكون عندكم مخططات لبعد بيوم انتحاركم ؟!
اخضر: صاحبيتي ماكلة راسي بالموضوع من زمان
بني: وين بدكم تروحوا ؟
اخضر: مش عارف لسا, والله رح تقتلني. المفروض انا اخطط كل اشي!
اسود: انا بدي اروح علي البيت يا جماعة, سهرة جميلة كانت!
احمر: انا شكلي بدي اروح كمان, خذني معك
بنفسجي: انا بدي احضر فلم, مين يروح معي على السينما
اخضر: مش عندك مناقشة مشروع تخرج بكرة؟
بنفسجي: ما تخاف, الموضوع بسيط كثير
بني: انا بدي اشيل الشراشف واروح انام, تصبحوا على خير
اسود: تصبح على خير, يلا سلام
اسود: تصبح على خير, يلا سلام
بنفسجي واخضر: سلام !
