الاخوة Joel و Ethan coen من المخرجين المفضلين عندي مش بس لاختيارهم لقصصهم اللي بحشروا شخصياتهم فيها بمواقف غريبة ما الهم علاقة فيها ولا بس للطريقة الاستثنائية اللي بكتبوا وبصوروا فيها الحوار اللي الى اليوم ما في مخرج بقدر يقلدها, اللي بخليهم من المفضلين عندي هو استخدامهم للسينما كاسلوب عرض لافكارهم وفلسفاتهم بدون ما يكونوا "فوقيين" وبدون ما يرموا الفكرة بوجه المشاهد. اليوم بدي استعرض فلمهم A serious man اللي شخصيا بعتبره افضل فلم الهم لانه مفتاح شيفرة بوضح الفكرة الرئيسية اللي بتشكل الاساس لمعظم افلامهم.
بحكي الفلم قصة لاري شخص ناجح نسبيا في حياته وبعتبر نفسه صالح دينيا ومن "الطيبين". من بداية الفلم لاري بتبلش تصير معه مصيبة ورا مصيبة مربوطين ببعض بحرفية ال Coen وكانها خدعة بصرية كل المصايب بتبين مصيبة وحدة كبيرة .بالبداية واحد من طلابه بترك على مكتبه رشوة عشان ينجحه, مرته بتقرر تتركه وتتزوج واحد ثاني, مرته بتطلعه من البيت, "خطيب" مرته بموت بنفس الوقت اللي بعمل فيه حادث وهو اللي بضطر يدفع تكاليف جنازته,,,, وكثير مصايب بتصير معه "بدون ما يعمل اشي" على حد كلام لاري.
المقال Job of Suburbia بناقش انه الفلم عبارة عن قصة ايوب الموجودة بالعهد القديم نقلت لضاحية امريكية بس الاخوين Coen بنكروا الموضوع وبحكوا انه مجرد صدفة ومش هذا كان هدفهم وانا متفق معهم. مع انه من الواضح انه الفلم بناقش نفس سؤال كتاب ايوب "لماذا يعذب الصالحين؟" وهو السؤال اللي بحاول لاري يلاقي اله جواب طول الفلم وبحاول يفسره باكثر من اداة:
1 الدين: لما يكون واقع بمشكلة بحاول يسأل رجال الدين بس ما بجاوبوه, الحاخام الاول الصغير بعطيه نصيحة مبتذلة (حاول تغير الطريقة اللي بتشوف فيها المشكلة). الحاخام الثاني الاكبر منه بعطيه قصة ما الها معنى وبنكتشف انه بحكيها للكل. الحاخام الكبير برفض يشوف لاري كانه رافض الابتذال ومحاولة فهم خطة الاله في الارض.
2 العلم: اخو لاري بحاول يحلل الحياة من وجهة نظر علمية عن طريق نظرية رياضية بس بوقع بمشاكل. لاري نفسه بدرس نظريات زيها (نظرية شرودنجر مثلا وانه الحياة عشوائية) بس ما بتقنعه لما يحلم ب"بخطيب" مرته الميت بحكيله انها "نظربة ذكية, بس هل هي مقنعة؟"
3 المخدرات: بحاول يتعامل مع مشاكله عن طريق المخدرات والموسيقى مع جارته (نفس اسلوب ابنه بالتعامل مع المشاكل) بس ما بتعطيه الحل كمان وكل اللي بتسويه انه بتعطيه وجهة نظر ثانية لمشاكله (اللي هي نصيحة الحاخام الاول) . نوع ثاني من "المخدرات" انه يتجاهل مشاكله: مرته ومحاميه بحاولوا يخلوه يتجاهل الموضوع (هاي المشاكل مش مهمة, حاول تنسى الموضوع وما تركز على الامور الصغيرة) بس هاي الطريقة بتوصله لمشاكل ثانية, زي لما يتجاهل انه جاره بقص جزء من العشب تبعهم مرته بتنصحه يتجاهل الموضوع بس هذا بخلي جارهم يتعدى على ارضهم.
حتى الفلم نفسه بفشل بتفسير سبب المشاكل بمرحلة معينة لانه الاخوة Coen عارفين انه الفلم والقصة هم برضه اداة من هاي الادوات فما بعرضوا المسببات ورا مشاكله وبتضل بدون تفسير والفلم بنتهي ببداية مصايب جديدة وما بعطينا خاتمة.
اللي حابين يعرضوه الاخوين من كل الفلم مش محاولات فهم سبب حدوث المشاكل مع لاري ولا يحاولوا يجاوبوا على سؤال "لماذا يعذب الصالحين؟" بس فكرة ثانية اهم, بتتوضح تقريبا بالمشهد الافتتاحي المصور على ابعاد مختلفة عن باقي الفلم ( واحد بستقبل قريب مرته في بيتهم. مرته مقتنعة انه الشخص هذا مات من 3 سنين والتفسير الوحيد انه الشيطان اخذ جسده فبتطعنه وبطلع الزلمة من البيت بدون ما نعرف اذا مات ولا لأ واذا هو شيطان ولا لأ) بعد ما يطلع من البيت المرأة بتكون متأكدة من صحة اللي عملته وبتدخل تنام مباشرة بس زوجها بضل خايف وقلقان انهم قتلوا واحد بريء.
اللي بحاول الاخوين Coen يوصلوه بهذا الفلم وباقي افلامهم انه الحياة ما بتقدر تفسرها وما الها معادلة او حكمة مستفادة, ممكن تستخدم ادوات زي (العلم, الدين, المخدرات,,,) بس هاي ادوات قاصرة بتعطيك راحة وهمية وما بتجاوب فعليا على اسألتك واكيد ما بتجاوب "لماذا يعذب الصالحين؟"
