في 2006 اعلنت شركة Netflix عن مسابقة بمليون دولار لمن يتغلب بنسبة 10% على خوارزميتها للتنبؤ بافلام قد تعجب المستخدمين بناء على تقييماتهم السابقة, عانى المتسابقين من صعوبة وبطأ في تطوير الخوارمية. بناء على البعض احد الاسباب كان Napoleon Dynamite اللي بدأ كفلم مستقل وحقق شهرة واسعة ب2004. المشكلة كانت بانه كل الخوارزميات كانت تفشل بنسب عالية عند التوقع باعجاب المستخدمين للفلم مقارنة بباقي الافلام ,بالنسبة الهم الفلم غريب وواقع على طرفين الطيف, اما بتحبه وبتعتبره تحفة فنية او بتكرهه وبتعتبره مزعج. المشترك بالطرفين انهم ما بقدروا يحددوا سبب واضح لحبهم او كرههم. بالنسبة الي مش هاي النقطة اعظم ما بالفلم, Napoleon Dynamite واحد من افضل تجسيدات الوحدة ,العزلة عن المجتمع وعدم الارتياح اللي انعرضت مش في القصة بس لكن في الاسلوب ككل وهذا اللي بدي احكي عنه.
بشكل عام اللقطة الاستفتاحية مش بالضرورة الافضل او الاشهر بالفلم, لكنها اكثر لقطة حاسمة وهي المفتاح اللي بستخدمه المخرج الذكي لنقل الفكرة والجو العام, هي اول جزء معلومات بوصلك وهي اللي بتجهزك لل90 دقيقة الجايين.
في اول لقطة بعد عرض اسماء الاستوديوهات والممثلين بطريقة ذكية بتدخلك بجو الفلم العام وبتعطي معالم بسيطة عن شخصياته, بنشوف بطل القصة (كلمة بطل سيئة هون ,فعليا هو ما بقوم بالقصة لكن القصة بتمشي حوله, فخلينا نستخدم كلمة الشخصية الرئيسية). فالشخصية الرئيسية موضوع بمنتصف لقطة واسعة فصلته عن العالم المحيط, من اللقطة الاولى بحاول المخرج يعرضلنا وحدة نابوليون وحياته ضمن فقاعة شفافة غير موصولة بفقاعة المجتمع.
نابوليون ما اله اي اصدقاء, عايش في عالم خيالي بمخلوقات خيالية, مبعد من الجميع وبتصرف تصرفات الاطفال بعتبروها طفولية. اخوه متوهم حلمه يصير مصارع لكنه بقضي اليوم وهو بحاول يلاقي حب على الانترنت, حتى جدتهم اللي ما بتظهر اي اهتمام الهم بتركب دراجات رملية وعايشة في سن الشباب ورافضة تعيش عمرها. عمهم اللي بعتني فيهم عايش في الماضي وايامه كلاعب كرة قدم. كلهم بحاولوا يتعاملوا مع الوحدة بشكل مختلف حتى موقع بيتهم جنب حقل بعزز جو الوحدة والانفصال عن المجتمع.
الشخصيات الاساسية ما بتواصلوا بشكل فعال ومفصولين عن بعضهم, معظم حوارتهم همهمة, كانه معظم الرسالة ما بوصل وفي الغالب بنتهي الحوار بدون اي نتيجة. حتى نابوليون ما بتطلع مباشرة على اللي بحاوره وفي المعظم عينيه مش مفتوحين بشكل كامل كاضافة على الانفصال والعزلة. وفي حوار لما نابوليون يشرح لصاحبه ليش ما بقدر يوخذ اي بنت معه على حفل التخرج لانه ما عنده اي مهارات, بتظهر انه مش ضمن اي دائرة اجتماعية.
بالنهاية بعد مجموعة احداث عشوائية الشخصيات الاساسية بتلاقي الخلاص وبتغلبوا على للوحدة(اخوه اخيرا بلاقي الحب على الانترنت, عمهم بستقر وبترك حياته في الماضي, صاحبه بفوز بانتخابات المدرسة, ونابوليون الكل بحب رقصته وبتخليه مشهور) الا انه بتحس بعدم الاكتمال, بانه شخصية نابوليون ما تغيرت او توصلت لنتيجة.نابوليون ما عرف يتعامل مع شهرته بالمدرسة وهرب من المسرح. لسا ما بقدر يتعامل مع المجتمع ,رفض يطلع من فقاعته وضله معزول.
المخرج بستغل كل العناصر مش بس ليحكي هاي القصة وشخصياتها الوحيدة العايشين بعدم ارتياح, برضه بخلي المشاهد يحس بعدم الارتياح وعدم اكتمال. مثلا مش بس ما بجاوب سؤال وين ابوهم وامهم, هو ما بطرح السؤال اصلا. الفلم بظهر على السطح انه كوميديا تافهة ولما تتفرج عليه من هاي الزاوية بخلمك وما بتقدر تحصر سبب حبك او كرهك اله. لهيك هو مش فلم كوميدي كليا وعشان هيك كانت المليون دولار تعون Netflix صعبة ولهذا السبب ما في اي فلم بشبهه.
