حياتك

بفتح الثلاجة في شقتي الفاضية وبكتشف انه ما في بيض. لازم البس وانزل اشتري بيض.

ليش ؟

ليش لازم اشتري بيض ؟ كيف حياتي رح تتحسن بوجود عجة؟

شو رح تفرق لو متت هسا ولا متت كمان عشرين سنة ؟!

مشيت من عند الثلاجة بدون ما اسكرها. جبت كرسي واقوى حبل عندي.

اخر اشي سمعته صوت الحبل وهو بنشد بعد ما وقع الكرسي.

"اهلا وسهلا بك الى سينما الجهة الثانية- فلم الليلة:حياتك!"

"لو سمحت عمو, بصير تشتريلي بوشار ؟"

هذا انا ! هذا 6 سنين انا !

"هي جبتلك بوشار, يالله امسك ايدي وخلينا نفوت"

وهذا 20 سنة انا.

"لو سمحت, بس شو في ؟"

"ولا اشي, انتحرت وهيني هون"

"انتحرت؟ ليش؟ شو صار؟"

"ولا اشي, طلقتني وما ضل صحاب ولا شغل"

"خرا كثير هيك! طيب خلينا ندخل نشوف"

دخلت ولقيتني, كل سنيني. كلهم قاعدين بوكلوا بوشار وبستنوا الفلم.

"حج ! معك ولاعة؟!" مراهق لابس طاقية بالعكس وحاط سيجارة على اذنه.

"لا, وما تدخن لأنه رح تندم بعدين"

"طيب اتكل على الله يا حج!"

مش مستغرب اني كنت اكره حالي وقتها

العشريني قاعد باشرلي "تعال, هي لقيت مكان. بسرعة !"

قعدت جنبه لأنه افضل الموجودين حاليا,,, الشاشة صارت سوداء وما ضل الا صوت البوشار وهو بتاكل.

بلش الفلم

حمام طاير غطا الشاشة كلها
"مش هذول,,, ؟"

"اه هذا الحمام بدار ستي في المخيم." 

ستي والحمام اللي عندها اول ذكريات عندي, طول الوقت كنت اطعميهم خبز واحاول امسكهم.

بعدين ابوي بحاول يعلمني اسبح, مش كثير متذكر هذا اليوم بس اللي عمره 6 سنين جنبي مبسوط وبتفرج على حاله وهو بغرق.

اول يوم مدرسة, كل الصف بضحك علي عشان عملتها على حالي. انا مش عالم نفس بس اتوقع معظم مشاكل شخصيتي سببها هذا اليوم.

سنة 16, انا بدخن في الغرفة مع صحابي وبنألف اغاني راب, تطلعت وراي عشان اشوف المراهق قاعد بغني مع الفلم وهو حاطط السيجارة المطفية بتمه.

لو بقدر اشطبه من حياتي !

الجامعة, مرت اسرع من اغنية الراب.

بس هيها بروب التخرج.

وهسا هيها بفستان ابيض.

العشريني جنبي مبتسم, يمكن هاي هي اخر ذكرى سعيدة عندي, بعدها ما في ترقية بعدها ما في شغل.

بعدها بطلت تحبني. وراحت.

وهيني قدام الثلاجة اللي ما فيها بيض.

بعرف النهاية ومش حابب اشوفها مرة ثانية, طلعت برة وقبل ما اطلع وقفني المراهق.

"يا حج, وين رايح؟"

"خلص بعرف اللي رح يصير وما بدي اشوفه"

"طيب, لازم تستنى. لسا ضايل شغلات ثانية"

"شو قصدك ؟!"

*ببتسم*

"انت مفكر رح نضل نحضر هذا للابد؟,,, هم بس بحضروك اياه عشان تتعلم من اخطائك"

"طيب ؟ وهسا شو؟"

المراهق بولع سيجارة وبعطيني اياها
"هسا بنقعد نتسلى مع بعض,,, هي الفلم خلص. بدنا نقعد نحضر star-wars"

"بدنا نحضر star wars؟؟"

"اه, يالله تعال قبل ما يبلش"

"استنى,,, هذول star wars الجداد ؟!"

"لا هذول بشغلوهم في جهنم بس !"